Jien naħseb li aħna qed ngħixu f'pajjiż fejn ma jonqosna xejn.
Saħħa b'xejn, edukazzjoni b'xejn, jekk tmut u ma jkollokx joħduk u jidfnuk xorta, u jekk ifettilek toqtol lil xi ħadd ghax tkun blajthom, jaqfluk f'post li jkun għal qalbek, dejjem 'high', tiekol u tixrob kemm trid mingħajr taħbil il-moħħ. L-iktar l-iktar iqabbduk tħit xi kostum u forsi jdumu naqra ma jħallsuk ghax il-Mrs tkun on holiday, mill-bqija buli tkun dħalt u buli aktar tkun meta toħroġ.
Li konna kemmxejn neqsin minnu kien id-divertiment u s-sorpriżi jew xokkijiet, sejħulhom li tridu.
Nistħajjilkom tgħiduli m'għandniex Paceville, L-MTV u l-Eurovision u l-parties kbar taħt ir-Rabat?
U l-imriewaħ sorpriżi tal-festa?
Dak mhux divertiment ta' l-ostra?
Xi trid aktar?
Veru dak divertiment, imma dak tip ta' buzz li ndara u li x'ħin tasal id-dar, dejjem jekk tasal, tkun insejt kollox u la tibqa' tiftakar jekk daħħaltux f' ta' Jinny u lanqas jekk billejtux f' ta' Mary.
Jien mhux ghal dak it-tip ta' divertiment qed nirreferi.
Qegħda nitkellem fuq id-divertiment ta' bin-nhar, li jżommna mqajmin matul il-ġurnata, ngħixu minn aħbarijiet tan-Net, ghal-One, għan-nazzjonal, minn gazzetta diġitali għall-oħra nixtarru l-kummenti tal-għorrief ta' Malta nofshom mixtrijin, u nistennew qisna tfal żgħar mikrumin għall-helu, it-tweet tal-Prim gustuż li għandna, il-press conference tal-Kap tal-Oppożizzjoni George Clooney tagħna, kif ukoll il-ġudizzju tas-saħħara edukata tal-Bidnija, u s-saħħara ta' wara l-mina Żurriqija.
Ikollna nammettu illi fi żmien in-Nazzjonalisti, anke jekk sirna kollha sinjuri għax kien taw siegħa xoghol ghall-Maltin kollha, konna neqsin wisq minn dan it-tip ta' divertiment. Allaħares ma kienx Austin Gatt kultant jghid xi ċuċata, jew Franco jżomm il-Gvern b'tixlilha, għax kieku sajmuna għal kollox minn kull gost u good time. Bħaħen li huma mhux żgur ma ppretendewx li ha jżommuna kuntenti bis-sejba t'arlogg tal-lira li ddobba Tonio Fenech.
Imma aħna poplu ffurtunat.
Ħlief ghal meta gie Dragut u kaxkar l-Għawdxin kollha ghall-fini tieghu, ix-xorti dejjem daħqitilna. Biżżejjed ngħidu li ftit snin wara lil Dragut stess temmiżnihielu, u lill-armata tiegħu tajniha kedda li baqgħet taħtha.
Intant, dan in-nuqqas t'eċċitament, li issa kien qed jifnina gie ndirizzat.
Fl-2013, il-poplu neħħa n-Nazzjonalisti li kif ghedtilkom b'Gonzi fit-tmun u RCC bl-ghasluġ f'idejh, kellhom wisq geddum, qrid u serjeta' u l-ebda sens ta' good time, u minfloku poġġew lill-ġinġer Joey, li flimkien mat-team fenominali tiegħu ma tilef l-ebda ħin biex jibda jippumpjalna l-gost gol-vini.
U minn dak il-mument id-divertiment u s-suspens ma qata' xejn.
Ġurnata wara ġurnata, kummiedja aqwa mill-oħra, sorpriżi w xokkijiet bla heda, skandli bla break u b'nifisna maqtugħ nippruvaw inlaħħqu magħhom.
Rigali kbar jitqassmu bħax-xita, min imissu l-Premier, Australia Hall, min jiddobba ż-Żonqor, min jifraħ b'xi torri sa gos-sħab, min b'biċċa art bis-sale, oħrajn jikkuntentaw b'casino, filwaqt li dawk li huma inqas magħzulin ilaqqtu xi biċċa palazz ġo Strada Zekka, xi pompa tal-petrol, xi fortizza antika, jew xi visa ganga style!
Kull min ġie għala l-għanqud u bena li fettillu ngħidulu mexxi, u kull min jipprova jġib permess ġust inqattgħulu qalbu u nisolħuh ħaj.
Naturalment dak li ma jitqassamx jinbiegħ, ibda miċ-ċittadinanza, kompli fl-isptar t'Għawdex, St Lukes u Karen Grech, il-Powerstation u spiċċa fil-latrini u ċ-ċimiterji.
Qisha l-fiera li jagħmlu ta' Lourdes f'tal-Ħniena f'Settembru, l-urna ddur u tagħqad u fuq minn taqa' jsir sultan.
Kollox ghal bejgħ u kollox doable!
Saħansitra l-Air Malta spiċċat mdendla fuq ħarira!
Imbagħad biex l-affarijiet jsiru dejjem u dejjem aktar eċċitanti, u nibqgħu nistħajluna dejjem Sherlock Holmes, minflok juruna x'kuntratti qegħdin jagħmlu, iħalluna nissoponu, nippruvaw naqtgħu, jagħtuna ftit ħjiel 'l hawn u 'l hinn kemm inbillu griżmejna filwaqt li jħalluna lampa stampa biex jkattrulna l-interess u l-kurżita'!
Sa karus fil-Panama fetħulna ħalli ma mmorrux nagħmlu f'qalbna u naqghu fl-anemija.
Anke fil-maġija saru jeċċellaw biex izommuna kuntenti, ghax għamlulna powerstation li kif naħslu ħa nibdew nimmaġinawha f'postha jgħidulna abra katabra u jerggħu jisparixxawha sakemm jagħtuna data ohra biex nistennewha tidher b'aktar ħerqa!
U ta' Joey l-ginger f'kulħadd jahsbu tafux.
Lanqas lill-midja internazzjonali ma ħallew barra izda raw kif għamlu biex din ukoll tgawdi minn dan l-eċċitament u s-suspens li qedin ngħixu ahna, ffurtunati li ahna! Wara kollox il-ġurnalisti barranin mhumhiex ħnieżer u x-xemx ghal kulħadd trid titla'!
Id-dinja kollha xegħlet bina. Sirna headlines fuq il-ġurnali internazzjonali kollha, l-aqwa fl-Ewropa f'kollox u l-uniku pajjiż iffurtunat li għandu ministru u chief of staff bil-kumpanija ġol-Panama!
Anke Fitch u Moodies qalu li aħna l-aqwa u faqqgħulna rapport bomba, l-aqwa li money no problem u ħlas fil-pront.
Inħallikom taħsbu kemm ser jitkattar id-divertiment fix-xhur li ġejjin, kemm ser ikollna shows peak u off-peak time, waqt il-Presidenza tal-Kunsill tal-UE!
X'ċuċ kien ic-CHOGM, issa segwu l-Presidenza ħalli taraw kif ha jħallukom bla nifs aktar minn meta kixfet kollox Sharon Stone!
Dil-ġimgħa kellna togħma ta' x'inhu gej bl-intervista' ta' Leo fi Brussell, pero dik biss togħma, antipasto kif jgħidu t-Taljani. Jien ngħidilkom ibqgħu segwu, moħħkom hemm, għax kif iħobb jghidilna Joey l-Prim: l-isbah żmien ghal Malta għadu ġej!
U l-kbir għadu ġej ukoll!