Biex niċċaraw l-affarijiet.
Bħal lum erbgħa snin kien qed jinħass ir-riħ tal-bidla fil-pajjiż.
Aħna l-pinnuri konna qed ngħidulhom x'kellha tkun id-direzzjoni lin-nies.
Kien hawn bżonn bidla, wara 25 sena PN.
Emminna fil-Moviment Laburista. Ngħaqadna taħt l-għajta ta' Malta Tagħna Lkoll, stinkajna u pperswadejna n-nies, u ġibna l-bidla.
Ir-riħ ma nefaħx għalxejn.
Illum, inqas minn erba' snin wara, għandna gvern b'ucuh differenti (mhux biss litteralment!) imma mnawwar bl-istess problemi li kellu l-gvern ta' qablu, bid-differenza illi dak li ridna nneħħu fil-gvern ta' qabel, erġajna twikkejna bih għax qiegħed fil-gvern ta' issa f'doża ferm aktar qawwija, u wara biss ftit taż-żmien.
Li għandna aħjar hija l-magna tal-ispinn, ir-rekord ta' sale ta' gid il-poplu, l-flus fl-idejn għal xi wħud, id-drittijiet ċivili, it-turizmu, u l-kura tad-diżabbli u l-anzjani.
Mill-bqija, msallbin bi gvern li avveliena mad-dinja kollha, u mhux minħabba l-karus jew tnejn fil-Panama biss.
Mhux ta' b'xejn iż-żiffa ġa bdiet terga' tinħass, biex ma ngħidx xi buffura wkoll.
Imma issa poġġu nawra rwieħkom fiż-żarbun tiegħi.
Ħamsin sena, omm ta' tlett itfal li għallimthom l-iskola kemm flaħt, ħdimt dejjem tqala w mhix, tletin sena dentista, self-employed għomri kollu, dejjem fil-politka, u bil-kappel li kelli dejjem sellimt lill-komunita Maltija, għaliex trid u ma tridx meta tkun tipprattika professjoni minn qalb in-nies, tispiċċa tibki u tidħaq magħhom anki meta l-biki tagħhom jaħbat mal-ferħ tiegħek u d-daħq tagħhom ikun f jum ta' niket tiegħek.
Fil-prattika tal-professjoni ħaġa mill-lewn id-dinja li lanqas jgħaddilek minn moħħok ħsieb fuq kulur politku meta jidher proxxmu quddiemek.
Isservi.
L-interess tal-pazjent fuq quddiem dejjem. Mhemmx fhiex titfixkel. Jaqbillek u ma jaqbillekx, tkunx imdejjaq, ferħan, muġugħ jew imkisser minn gewwa. B' pazjent quddiemek, jezisti biss il-bzonn u l-interess tal-pazjent.
L-istess fil-politka għal min jidħol għaliha b'vokazzjoni.
M'hemmx x'tara jew x'tahseb.
Għalija fil-politka lejalta waħda għandu jkollna: lejn pajjiżna, lejn iċ-ċittadini Maltin kollha.
Hekk naħilfu aħna meta nieħdu l-ġurament bhala deputati fil-Parlament, u hekk nagħmel jien anke kieku ma ħadtx ġurament, ghax l-irġulija hekk titlob.
Allura lili jgħajruni li jien pinnur għax, kont fejn kont, kif l-interessi jibdew ikunu tal-ftit magħżulin iħarsu l-isfel, u mhux tal-kotra tittama b'ħarstha 'l fuq, jien ġbidt l-attenzjoni kemm flaħt, bqajt insostni l-lejalta tiegħi lejn pajjiżi kollu mhux biċċa, u rrifjutajt li niddakkar mill-ħmieġ li llum sar sinonimu mal-politka partiġġjana.
U hekk qed nagħmel illum.
Iffurmajna partit ġdid għal dawk fostna li jemmnu li fil-prattika, jista' jkollna governanza nadifa, ġustizzja soċjali sinċiera, u tkabbir ekonomiku li jimxi id f' id mal-ħarsien tal-ambjent u saħħet il-poplu tagħna.
Għalija mhix xi haġa gdida żgur għaliex manifest mibni fuq dawn it-tlett pilastri diġa fissirtu meta hriġt mal-Moviment Laburista fl-2013.
U n-nies emmnu u riedu dik it-tip ta' politka, u għadhom jemmnu u jridu dik it-tip ta' politka matura li tixraq lil pajjiżna aktar minn ħamsin sena wara li ksibna l-indipendenza.
Il-problema hija li n-nies issa xogħfiena għax il-kelb il-mismut kull ilma jaħsbu mishun. Ħadd ma basar li l-gvern Laburista li tellgħajna kien ser idaħħaq u jbikki n-nies bih daqsekk malajr, u jtertaq is-sisien tal-manifest tiegħu stess.
Allura hawn min tfantas x'ħin induna li aħna tal-Partit Demoratiku qed nitħaddtu mal-akbar partit fl-oppozizzjoni, il-Partit Nazzjonalista, li qed ibaghti biex jikseb il-fiduċja meħtieġa biex jkun il-Gvern Alternattiv tant meħtieġ biex jiehu post il-klikka dilettanti tal-Panama li twikkejna bihom bla ħsieb.
Jien ngħidilhom kalma, ħbieb.
Erba' snin ilu tiftakruni nikkumbatti biex inneħħi l-PN li kien spiċċa ħażin wara 25 sena, u nitlobkom tagħtu cans lil Muscat (wara li kont ppruvajt npoġġielkom lil Gorg Abela mexxej tal-Labour, għax kelli dubbju f'Muscat!).
Jien l-istess persuna għadni.
Mhux ħa ninbidel.
Stajt għalaqt ħalqi, għażilt li ngawwdi u qgħadt inpappi minn fuq daharkom kif għamel ħaddieħor.
Minflok għazilt li nfittex l-interess tan-nazzjon kollu kemm hu, u servejt tal-ħajt imkaħħal anke meta l-oppożizzjoni nazzjonalista kienet siekta u taħt ix-xokk tat-telfa.
U hekk ser nibqa' nagħmel.
Biex ikollna Gvern ġdid jeħtieġ maġġoranza tal-voti.
Il-PN qed isibha difficli jinbidel biżżejjed minn gewwa billi jtajjar tużżana rjus.
Ahna tal-PD jista' jkun li nkunu kapaċi nibnu oppożizzjoni soda u sinċiera ma' kull min għandu l-interess nazzjonali l-ewwel ġo qalbu, inkluż is-sezzjoni tal-PN li trid tiġġedded bis-serjeta.
Dak hu kollu.
Ha nagħmlu li hemm bżonn fil-prattika.
M'hemmx kastelli fl-ajra.
Infakkarkom li meta nkunu f'pajjiż barrani u jistaqsuna minn fejn aħna la ngħidulhom mill-PN, la mill-Labour, la minn Nigret u lanqas mill-Imdina. Ngħidulhom aħna Maltin, aħna minn Malta.
U hekk ser tkun il-forza politika gdida li ser tiggverna sena w nofs ohra.
Forza politika Maltija u Ghawdxija, ta' Malta u t'Ghawdex, koalizzjoni ta' nies li ma jaqblux f' kollox imma li jaqblu li pajjiżna jixraqlu ahjar, u lesti li jagħtu sehemhom biex pajjiżzna jkun tassew u f'kull sens ahjar.
Fejn hemm ir-rieda tinstab it-triq hbieb.
Kollox bil-mod. Kollox f'waqtu.
Li naf żgur huwa li ha naslu.
Ħafna hafna xoghol, imma naslu.
Naslu ghax ahna l-veru partit tal-ħaddiema, u x-xogħol dejjem dħalnielu, qatt ma ħrabnieh.